النهارده الجو أصفر وتراب وحاجة ربنا يعافينا منها ... المهم رغم كل اللى فات دا ورغم الجو رحت الانترفيو اللى كلمونى عشانهااليوم اللى فات !! لحد هنا والكلام كله منطقى جدا وواقعى جدا
دخلت على موقع الشركة لاقيت خيال وشركة كبيره ومكانها ابن ناس وفى منطه حيويه وخلافه ... ابتسمت وقلت الحمد لله .. اخرت صبرى خير ... ولعنه المكان اللى كنت فيه حتبدأ تتفك ويالا يمكن الورقه اللى بكتب فيها اسماء الامكان اللى ... رحتها وعملت فيها مقابلات تخلص بقى وارميها وتبقى نهايه سنه وبدايه سنه جديده بحاجه كويسه ليا ...
بدأ الموضوع بالتاكسى اللى انا بقول عليه شطرنج ( مربعات ابيض فى أسود ) ركبته والاقى السواق بيمشى من اخر بلاد الله عشان يوسع المسافه عشان العداد . قلت فى عقل بالى مش مشكله .. لعله خيرا ... وصلنا المكان بديله الفلوس .. معلش يا فندن معيش فكه ممكن تفكى !!!
قلت فى بالى مش مشكلة .. الحساب 15 جنيه وانا لا معايا فكه ولا هو معاه .. نتصرف نزلت والحمد لله فكيت .. لحد هنا وكويس بديله بقى 20 جنيه عشان يرجع 5 لاقيته خد الفلوس ومشى !!!
وقفت مذبهله شويه وقلت "منك لله" لازم تعمل فيلم ومعايشش فكه ومش عارف ايه ؟؟
دا التاكسى .. فاضل بقى الشركة
اركب الاسنانسير ادوس الدور ما بيطلعش :) ادوس تانى :) ما بيطلعش ... المهم ندهت الحارس قالى يا فندن فى رقم سرى للاسانسير .. قلت طيب ممكن اعرفه عشان اطلب
قالى يا فندم فى جوا لوحه ارقام دوسى 789* ايوا سبعه تامنيه تسعه نجمه وبعدين الرقم حيطلعك على طول .. لاقيت نفسى بضحك وبقول طيب خير ... يا الله وصلت للشركة :)
اباب شيك ولوحه شيك وقلت الحمد لله .. الباب اتفتح لاقيت شركة صغيـــــــــــــــرة وناس ملزقين فى بعض
اتفضلى اتفضلى .. اكتبلى ابلكيشن ولما تخلصيه قوليلى ... لابلكيشن كان على الكمبيوتر عشان موضوع الورق بقى والجرين بلانت والحركات اللى بيعمولها .. قلت كويس
مليت الابلكيش اسئله تحفه ... رغم ان الابلكيشن دى المفروض انها تكون واضحه وصريحه لانها عباره عن بيناتى الاوليه .... ها ايه الأخبار .. خلصت يا .... ( البنت السكرتيرة)
طيب فى اسيسمت لازم تعمليه .. قلتلها ماشى رغم انى لما سألتك قولتيلى انها فقط اتش ار انترفيو
المهم الاسيسمت طبعا على الجهاز .. اتفتح ملف ورد فيه 18 سؤال .. عارفين ايه 18 سؤال دول .. اسئله كدا بنقول عليها فى العربى اشرح مع التعليل والتفصيل الممل
طبعا بدات اجاوب ... وبدات احكى بالتفصيل ومواقف لانه شغل ... المهم لفت انتباهى انى فى امتحان اكاديمى .. يعنى كنت لازم اراجع كام كتاب فى الاتش ار واحفظ المصطلحات عشان اعرف ارد .. الحمد لله جاوبت واتبقى 3 اسئله يمين شمال انا مش عرفاهم
وعشان بحاول احافظ على امانتى .. قلت فى نفسى انا مش جهبز والامتحان دا عرفنى ان فى حاجات محتاجه اتكى عليها واعرفها
المهم ... دخلت بقى الانترفيو ... والفزلكه بدأت ... مهندس محترم صاحب شركة .. بتكلم باللغه الاكاديميه البحته
المهم بدات مرحله الاستفزاز منه الاول .. وقول امثله هولاميه سريالوزيه على راى البنات أصحابى وانا هاديه وكول وبرد
لحد ما قالى انا كنت عايز اجابه نموذجيه .... يعنى 1 و 2 و3
ساعتها ممسكتش نفسى ورديت يا فندم حضرتك بتعمل امتحان اكاديميى كدا مش انترفيو .. طبعا شقلب وشه وازاى وليه
انا يا بفيس المعرفه كدا ... رحت رديت وقلتله و know how تعرفها ازاى بقى ؟؟
كل اللى يهم حضرتك المعرفه مش التطبيق !!!
الصراحه تعمدت ارد وتعمدت اجيب جون ... فغير كلامه وقالى حضرتك مش فهمانى قلتله فهمنى يا فندم وعلى فكره فى سؤال بيتكلم عن حاجتين انا مش فاهمهم قالى ايه قلتله
trend analysis w ratio analysis ممكن حضرتك تساعدنى وتقولى حلهم ؟؟؟!!!
ساعتها بصلى اوى وقالى معنى trend analysis اما ratio analysis تقريبا مكنش مراجعها ...
ساعتها قلت فى نفسى انا عايزه اقوم كفايه كدا .... وهو انهى المقابله بشكرا لوقتك وحنبعتلك فى حاله الرفض او القبول .. كان نفسى اقوله انا مش موافقه اشتغل معاك اصلا :)
انا نزلت من المكان مضايقه ومحبطه ... مضايقه من الراجل اللى اتفزلك وعمل اسيسمت وهو نقله من على النت .. طيب ما انا ممكن اعمل كدا .. ومحبطه انه مش فاهم حاجه فى مجالى وبيسألنى ؟!!
على فكره انا سالته مواعيد شغلكم من كام لكام .... قالى من 9 الى 6 وفى ساعه بريك .. اول ما قالى كدا افتكرت صاحب شركه اشتغلت معاه لمده شهر .... لانه كان بيتعامل مع الناس اللى شغاله معاه انهم كائنات خادمه ليه ودا مبدأ مرفوض بالنسبه ليا
انا نزلت من المكان ومشيت لمده ساعتين فى الشارع .. بفكرفى امرى
بفكرى فى الامور والطلبات اللى اتفقت فيها مع نفسى ومش حتنازل عنها .. حتى اذا مدة بحثى عن عمل طالت
انا اتصلت بصديقه ليا اقولها انا محبطه وحللنا اللى حصل معايا .. لاقيت ان الدنيا بخير وان الواحد مش محتاج يتفزلك عشان يبقى صاحب شركة :)
وحسيت ان فى ناس لما تيجى تعمل معاها مقابله عمل تتنطط عليك ... الا دا ليه صحيح ؟؟؟؟
حد ممكن يجاوبنى ؟؟؟