الجوزاة لا يمكن تتم
جربت تقعد فى مكان ويكون جنبك بنت وولد وامهاتهم فى قاعده تعارف بغرض الجواز ؟؟؟
اهو دا اللى حصلى ... ومقردتش ودنى تمسك نفسها من الحوار اللى شغال .. اللى بجد كان عباره عن مباراة بين الطرفين ..... البنت والولد دكاتره وواضح ان الولد دكتور فى العلوم والبنت طبيبه بشريه او حاجة زى كدا ... اللى لفت انتباهى ان ام البنت قالت كلمه خلت مامت الولد تقوله ارد انا ولا ترد انت ؟؟؟
ساعتها قررت اكتب عن الحاله اللى شفتها وحستها من جوايا من قاعده الناس دول مع بعض ؟؟
والنظره الحديثه لجواز الصالونات اللى هو افشل مشاريع الكرة الارضيه .... من وجهه نظرى المتواضعه جدا واللى مافيش داعى اخوض فى تفاصيلها دلوقتى .
صحيح انا معرفش بيقولوا ايه دلوقتى وانا بكتب عنهم ...بس احساسى ان الجوازة دى لا يمكن تتم ... هو فى جوازة تبدأ بالسى فى .. هى مقابله اتش ار من اللى بعملهم فى شغلى ولا حياة ومستقبل وقبول ومشاعر بتتولد بين الطرفين ....
كان نفسى اقول للامهات وبالذات ام البنت سيبى لبنتك فرصه تتكلم عن نفسها فى وجودك .... والولد اللى مامته انحمقت اوى لابنها عشان ام البنت بتقلل من كونه مش دكتور بشرى !!!
ربنا يرزقنا التركيز واختيار الكلمات وحُسن المقابله وحُسن التعامل .
